Hirsigrautur

_MG_1918Hirsi er útbreidd korntegurnd sem er ræktuð í Afríku, Norður Ameríku og Evrópu. Það er ein elsta korntegund í heiminum og var mikilvæg undirstöðunæring í fleiri hundruð ára í Evrópu. Hirsi er mjög ríkt af kísil, magnesíum, kalíum og fosfóri, inniheldur einnig járn og flúor.

1/2 dl hirsiflögur
1 1/2 dl vatn
tæpur dl mjólk (móðurmjólk, þurrmjólkurblanda eða stoðmjólk ef barnið orðið eldra en 6 mánaða)
1 tsk fita

Hirisiflögur, vatn sett í lítinn pott og suðan látin koma upp á meðan hrært er í grautnum. Mjólkinni bætt útí og látið malla í nokkrar mínútur þar til þykknar. Þynnt með meiri mjólk ef þurfa þykir og fitunni bætt útí.

Ef barnið er að byrja að borða þá er gott ráð að setja töfrasprotann í flögurnar og gera þær að mjöli því þá fæst mýkri áferð sem hentar börnum sem er að byrja borða betur.

 

Bókhveitigrautur

_MG_1254

Bókhveiti er í raun fræ en ekki korntegund og er skylt súrum og rabbabara. Það hefur verið vinsælt til neyslu í Asíulöndum í hundruðir ára en neysla á vesturlöndum fer sífellt vaxandi. Bókhveiti er mjög næringar- og trefjaríkt, ég kynntist því fyrst í Danmörku fyrir 12 árum og hef notað það mikið síðan bæði í grauta og bakstur.

1/2 dl bókhveiti flögur
1 1/2 dl kalt vatn
1 tsk fita
Tæpur dl af mjólk (brjóstamjóllk, þurrmjólkurblanda eða stoðmjólk ef barnið er orðið 6 mánaða)

Bókhveit flögur, vatn og mjólk sett í lítinn pott, suðan látin koma upp á meðan hrært er í grautnum. Látið malla smá stund þar til þykknar. Þynnt með meiri mjólk ef þurfa þykir og 1 tsk af fitu bætt út í.

Ég legg bókhveitiflögur alltaf í bleyti yfir nótt eins og hafra (þ.e. ef ég man það) því þá verður grauturinn mýkri og meira “creamy” og það styttir líka suðutímann. Það er þó ekki nauðsynlegt að leggja í bleyti.

Bókhveitiflögur og vatn sett í krukku að kvöldi, lokað vel og geymt í ísskáp. Að morgni er blöndunni hellt í lítinn pott og mjólkinni bætt við og soðið eins og kemur fram hér að ofan.

Ef barnið er að byrja að borða þá er gott ráð að setja töfrasprotann í flögurnar og gera þær að mjöli því þá fæst mýkri áferð sem hentar börnum sem er að byrja borða betur.

Eins og með aðra grauta er tilvalið að bæta ýmsu út á grautinn til að fá meiri fjölbreytni, t.d. ceylon kanil, ávaxtamauki, vanillu, banana og hverju því sem hentar aldri barnsins.

_MG_1274

Maísgrautur – fyrsti grauturinn

_MG_2025

Maísgrautur er mildur og mjúkur grautur sem hentar vel sem fyrsta smakk fyrir börn sem eru að byrja að smakka fasta fæðu. Þessi uppskrift er lítil og grauturinn verður mjög þunnur sem hentar vel í byrjun.

1 msk maísmjöl
4 msk kalt vatn
4 msk brjóstamjólk eða þurrmjólkurblanda
1 tsk fita

Hrærið saman maísmjöli og vatni í litlum potti og látið suðuna koma upp á meðan hrært er í. Látið malla við lágan hita í 2-3 mínútur. Takið pottinn af hitanum og bætið við mjólk til að þynna grautinn ef þarf og bætið fitunni út. Þynnið með meiri mjólk ef þurfa þykir.

Hrísmjölsgrautur – fyrsti grauturinn

_MG_2024

Hrísmjölsgrautur hefur mjög milt bragð og mjúka áferð og hentar því vel sem fyrsta smakk fyrir börn. Þessi uppskrift er lítil og grauturinn verður mjög þunnur sem hentar vel í byrjun.

1 msk hrísmjöl
4 msk kalt vat
4 msk brjóstamjólk eða þurrmjólkurblanda
1 tsk fita

Hrærið saman hrísmjöli og vatni í litlum potti og látið suðuna koma upp á meðan hrært er í. Látið malla við lágan hita í 2-3 mínútur. Takið pottinn af hitanum og bætið við mjólk til að þynna grautinn ef þarf og bætið fitunni út. Þynnið með meiri mjólk ef þurfa þykir.

Athugið! hrísmjölsgrautur er stemmandi og því er mikilvægt að kynna nýja fæðutegund eftir örfáa daga. Það má ekki gefa börnum graut með hrísmjöli daglega vegna þess að hrísgrjón og aðrar vörur framleiddar úr þeim innihalda arsen sem getur verið skaðlegt heilsunni. Það er þó ekki talin ástæða til að forðast hrísmjölsgraut alveg, heldur breyta á milli grauta og gefa aðra grauta í bland.